真道失言助理校長致歉家長聲援　徐緣：堅強面對挫折身教學生

真道書院助理校長戴健暉早前在社交平台以「Alvin Tai」之名，發表警員的子女「過唔到7歲」、「死於非命」等咒罵言論，前行政長官梁振英更去信校監，要求將其革職，引起外界關注。女兒就讀真道書院的著名作家、市場營銷專家徐緣（原名徐俊文）昨（29日）發文稱，涉事戴老師為其言論深表歉意，他認為，老師非聖人都會有情緒，應堅強面對挫折身教學生。

徐緣昨在其facebook專頁發文，稱自己是真道書院家長，戴Sir言論明顯過咗火位，是不爭事實，當獲悉事件，第一個反應是，「究竟個社會崩壞到乜嘢程度，先會令平日斯文得體嘅老師，情緒波動到要去咒罵警察。」

徐緣又稱，並非要除掉忍不住發洩的老師，而是要正視整個抗爭運動中老師們的心理健康，坦言「老師都係人，唔係聖人，都會有情緒，都會講錯嘢。有老師犯錯，就要馬上除之而後快，並唔係解決緊問題，只係想解決提出問題嘅人。」而事發後，許多家長學生出信聲援戴Sir，他亦聯絡到戴Sir，對方為自己言論深表歉意，他鼓勵戴Sir堅強振作，「面對人生突如其來嘅低谷，面對之前意想唔到嘅挫折，都要保持失敗者優雅嘅身姿。同學都係度睇住你，學習乜嘢叫抗逆力。」

徐緣亦對前行政長官梁振英去信真道書院，促將戴Sir革職，認為此刻直接以公權力向學校施壓，是白色恐怖；又認為「如何處理戴 Sir 事件，係真道人嘅事，輪唔到梁振英說三道四，真道亦無必要特別向佢交代。」

徐緣是名校英華書院的高材生校友，其女兒原本讀德望幼稚園，即使德望已取錄女兒直升小學部，徐緣也決定為女兒轉校至位於將軍澳的真道書院，徐緣曾接受TOPick專訪時表示，「因為德望的文化較具競爭性，我不喜歡事事與人比較，不希望女兒在這種文化下成長。」並稱只求女兒讀書合格，「讀書優秀不代表生活快樂，不代表將來在社會一樣優秀。」

另教育局昨晚表示，會按既定程序嚴正跟進有關老師的道德及專業操守事宜，已聯絡學校，要求提交報告，校方承諾嚴肅處理事件。

徐緣【前特首追擊的老師】全文如下：

從未有一單新聞，由朝到晚有咁多人問我意見，今日就真道書院助理校長戴 Sir 發表仇警言論嘅風波，算破咗紀錄。理由好簡單，因為我係真道家長。

戴 Sir 言論明顯過咗火位，係不爭事實。即使喺係冇學生嘅私人 FB 戶口發表，為人師表都要小心自己嘅言行。喺今日呢個嚴重撕裂嘅社會，能夠影響下一代嘅人，我認為都應盡量避免激化人民鬥人民嘅 Hate Speech。

Hate Speech 有程度之分，最低賤嘅係直接鼓吹人地用暴力，然後仲唔認錯兼扮大義凜然嗰隻，例如何君堯喺佢直播節目《君事行動》中，鼓吹要對持相反意見者「打到片甲不留」，又讚元朗無差別打人嘅白衫軍「做得好」，就係最佳例子。

冇咁直接嘅 Hate Speech，係詛咒型，亦即戴 Sir 言論嘅種類。詛咒係一種發洩，唔會有警察因為詛咒而身體受傷，但實際效果係會深化仇恨，所以戴 Sir 後來收回言論並就此道歉，係恰當處理。

戴 Sir 我之前唔熟識，都係觀課時見佢同家長講解吓課堂設計，感覺斯斯文文四平八正，今朝睇到佢嗰段字，我第一個反應係，究竟個社會崩壞到乜嘢程度，先會令平日斯文得體嘅老師，情緒波動到要去咒罵警察。

一個政治問題，政府唔主動去解決，形成警察與示威者嘅對立，而雙方都有較激嘅一群，導致衝突越演越烈。要老師們抱住極端冷靜持平嘅角度分析，各打五十板，係知易行難。講永遠容易，但人心肉做，試想佢地見到同自己每日所接觸嘅學生差唔多年紀嘅年青人，為爭取公義而頭破血流，甚或因對政權失望而輕生自盡，冇可能唔悲傷，冇可能唔憤慨。只係大家知道要忍耐，而戴 Sir 選擇喺佢自己嘅私人戶口宣洩一下。

無論係藍絲黃絲，我地要做嘅，並唔係要除掉呢啲忍唔住發洩嘅老師，而係正視整個抗爭運動中老師們嘅心理健康。老師都係人，唔係聖人，都會有情緒，都會講錯嘢。有老師犯錯，就要馬上除之而後快，並唔係解決緊問題，只係想解決提出問題嘅人。

今日我嘗試聯絡戴 Sir，佢為自己言論深表歉意。我坦白同佢講，佢嗰番言論確係唔恰當。作為教育工作者，校方如何處理你控制唔到，但你控制到自己如何為錯誤作承擔。好好想想怎樣道歉，謙卑接受意見或一點處分，係對學生最好嘅身教。

聽家長朋友講，戴 Sir 係個好老師，所以出咗事，家長校友學生今日都忙住出信聲援，反對嘅家長當然存在，但為戴 Sir 講好說話嘅，為數極多。呢啲艱難時刻，永遠係一個人嘅人品最直接嘅反映。我同戴 Sir 講，你要堅強振作，面對人生突如其來嘅低谷，面對之前意想唔到嘅挫折，都要保持失敗者優雅嘅身姿。同學都係度睇住你，學習乜嘢叫抗逆力。

本來戴 Sir 失言一事，屬校內事務，真道嘅持份者可以參與意見，傳媒作為第四權固然可以監察，但當中午時分梁振英介入，事件就變得有公共性，值得從另一角度解讀。

擁有權力者，都需要特別注意權力嘅恰當使用，尤其係公權力嘅持有人。梁振英先喺 Facebook 發帖，進而寫信向真道校監投訴，而關鍵係投訴信下款，直接寫上「前行政長官」及「全國政協副主席」，呢個係直接以公權力向學校施壓，根本係白色恐佈。

梁振英用重力追擊一個失言老師，係要對所有教育工作者產生寒蟬效應。校方要特別小心處理如何回應這位公權力濫用者，顯得太過軟弱而買佢怕，會對其他學校有示範作用，令呢位濫權者變本加厲。

如何處理戴 Sir 事件，係真道人嘅事，輪唔到梁振英說三道四，真道亦無必要特別向佢交代。我嘅建議係，真道校董會討論過後，內部作出處理便可。有傳媒跟進，以文明配合第四權，可以出公開聲明交代處理方法。

至於回覆梁振英，只需將公開聲明影印一份副本寄俾佢，為慳學校資源記得安排「郵資到付」，副本上面用紅筆寫住三隻大字：

「自己睇」。